Tempo pa lesa: 4 minuut
Pa sigura utilidad liber di e database, comunidad di Wikidata ta uza algun criterio. Si como organisacion bo kier añadi data, e data mester cumpli cu esakinan. Mas dilanti den e articulo ta haya splicacion di e puntonan mas importante.
Data riba Wikidata ta:
- Liber: a duna permiso pa publica bou di Creative Commons Public Domain Mark (CC-0)
- Relevante: data cu ta describi conceptonan of entidad material cla y idenficabel cu ta util den contexto di un banco di data generico tocante di mundo.
- Verificabel: Wikidata ta un database secundario, cu ta referi na otro fuente confiabel y publica.
- Adaptabel: Tur hende, tur caminda por adapta Wikidata mescos cu tur proyecto di Wikimedia. Como organisacion bo mester tene cuenta pues cu bo data por wordo cambia of coregi.
- Manteni: Wikidata ta un database bibo; e no ta un dump di data statico. Data riba e platforma ta wordo manteni.
Data liber bou di declaracion di Propiedad Publico di Creative Commons #
Si como organisacion bo ta bay añadi data riba Wikidata, bo mester duna permiso pa publica e data bou di declaracion di Propiedad Publico di Creative Commons (CC-0). Haciendo esaki bo ta renuncia di eventual derecho di autor cu como organisacion bo por tin riba e data y ta declara cu lo bo no claim e derechonan aki nunca mas den futuro tampoco.
Bo data ta bira liber di tur derecho di autor y door di esaki por reuza y adapta esaki. Asina por distribui bo data mas amplio posibel. Tur hende por uza bo data pa cualkier meta, p.e. pa enseñansa, pero tambe comercialmente.
E declaracion CC-O no ta exigi pa pone nomber tampoco. Cu un obligacion pa pone nomber, e uzo y combinacion di data di otro fuente ta casi imposibel.
Relevancia #
Data añadi riba Wikidata mester ta relevante; data mester referi na conceptonan bon defini, describi den fuente y/of mester ta util riba un di e diferente proyectonan di Wikimedia. E relevancia di e informacion riba Wikidata ta sirbi dos meta:
- Wikidata por sirbi como un banco di data general pa henter mundo
- Wikidata ta sirbi como luga central pa link diferente version (di idioma) di Wikipedia y proyecto di Wikimedia.
Un item por wordo agrega na Wikidata solamente si e ta sirbi pa por lo menos un di e dos meta menciona y si e ta cumpli cu un di e criterionan menciona aki bou.
E item:
- ta referi na un unidad conceptual of material cu por identifica claramente (edificio, persona, sorto di mata of bestia, buki, suceso etc.). Mester por describi e unidad aki door di fuentenan serio y publicamente accesibel.
- ta contene por lo menos un sitelink valido na un pagina riba Wikipedia, Wikivoyage, Wikisource, Wikiquote, Wikinews, Wikibooks of Wikimedia Commons
- ta cumpli cu un necesidad structural; e ta necesario, por ehempel, pa haci otro item mas util (p.e. un buki na cual te referi como referencia na un otro item).
E criterionan akiriba intencionalmente ta poco vago. Wikidata ta un database den desaroyo y e criterionan ta move hunto cu e desaroyo aki. Pa un descripcion mas detaya di loke por bay riba Wikimedia por wak riba e pagina di Wikidata-notability:
Wikidata:Notability
Verificabel #
Wikidata no ta un database cu ta acumula hecho tocante mundo, sino e ta un banco di conocemente secundario cu coleccion di link y referencia na fuente tocante e conocemento aki. Wikidata por ehempel no lo bisa como hecho con grandi e populacion di Hulanda ta, pero el lo duna e grandura di e populacion a base di referencia specifico (manera World Factbook). Cada ‘statement’ of ‘caracteristica’ riba Wikidata pues mester referi na fuente externo y confiabel na unda por verifica e afirmacion. Data riba Wikidata sigur por tin mas cu un balor, di diferente fuente, cu hasta por ta contradictorio; p.e. un artista cu, segun diferente fuente, por tin diferente fecha di nacemento.
Conexion cu otro database #
Wikidata ta un banco di conocemente cu kier cubri henter mundo. Na januari 2022, por ehempel, Wikidata tawata contene item tocante mas di 9 miyon persona. Pa por identifica y distingui tur e itemnan claramente y pa Wikidata por funciona como datahub pa otro fuente di informacion, control di autoridad ta un parti importante di e trabounan riba Wikidata.
Itemnan di Wikidata ta conecta mas tanto posibel cu database respeta y renombra. Den e sector di arte y cultura den Wikidatata ta referi e.o. na e siguiente databasenan:
Concepto y palabra clave: Getty’s Art and Architecture Thesaurus (AAT)
Persona y organisacion: Getty’s Union List of Artists Names (ULAN), RKDartists, Virtual International Authority File (VIAF)
Luga: Getty’s Thesaurus of Geographic Names (TGN)
Si tin duda; tuma contacto! #
Bo tin un dataset, pero bo tin duda si e ta apropia pa Wikidata?
Tuma contacto cu nos boluntarionan di Wikidata y plantia e cuestion cerca nan.
Of laga un mensahe via Facebook. Tin un grupo habri pa institucion di patrimonio y Wikidata unda bo por pone bo preguntanan:
https://www.facebook.com/groups/Wikidata.GLAM
Mas informacion #
Articulo relaciona cu esaki #
Kico ta propiedad publico?
